حصري...محمود الشهير بـ"اوشة" : "أوشه رئيس للجمهورية "

أوشة .. أشتهر جامد في رمضان اللي فات بعد ما عمل اعلان كيمو كونو وأتعرف
بأسم أوشة لكن هوه أسمه الحقيقي " محمود" و فكرة الاعلان دي كانت بالصدفة
.. محمود من كام يوم مضي عقد لمدة سنة مع شركة روزناما للانتاج الفني و
حيشارك في بطولة فيلم من انتاج الشركة.
مين هو أوشة ؟
انا أسمي محمود و مشهور بـ"أوشة" طلعت في إعلان كيمو كونو اللي اتعرض في رمضان اللي فات.


وازاي عملت الاعلان؟
انا بشتغل في نادي الجزيرة بلم الكورة اللي في ملاعب التنس وكورة القدم
والسلة, بعدين في مرة كنت بحكم في ماتش بيلعب فية المخرج "علي علي" مخرج
الاعلان بتاع كيمو كونو وهو اللي قال لي تعالي يا محمود انا عايزك معايا
هطلعك في التليفزيون, وفعلاً كلمني تاني يوم و قال لـ"أبويا" انا عايز
محمود يطلع في التليفزيون لكن انا في أول مرة مروحتش عشان الريس بتاعي في
الشغل كان بيهددني أني لو غبت هيطردني من الشغل وانا خفت و روحت الشغل
ومرحتش للمخرج لكن تاني مرة قررت اني أطنش للشغل و أروح أقابل المخرج " علي
علي" و قابلته في الزمالك و أخدني علي الزمالك عشان اجيب اللبس اللي هلبسه
في الاعلان و بدانا نصور من الساعه 5 الفجر لحد تاني يوم.


ومين اللي كان معاك في الاعلان وليك صلة بيهم؟
أيوة طبعاً انا اعرفهم كلهم عشان هما اعضاء في النادي وأعرفهم واحد واحد
وهما " بودي " عضو في النادي لكن كبيلعبش تنس وهوه ده اللي كان بيلف عشان
يلعب بـ"بلاي ستيشن" و أبانوب و مينا" و" فريد " ده اللي بيقول في الاعلان
"معرفش يا ماما، أنا اعرفة عشان هو معانا في الحته عندهم بيت في أمبابة في
عزبة الصعايدة جنب حمدي بتاع الكبدة.


وأزاي جهزت نفسك عشان تطلع في الاعلان؟
روحت أنا و أبويا أشترينا 2 بنطلون و 2 تي شيرت و كاوتش بـ100 جنية لكن في
الآخر ملبستهمش لبست بنطلون بس و الفانلة اللي لبستها في الإعلان دي كانت
قديمة.


وشوفت بودي بعد الاعلان ؟
أيوة شفته في الاعلان.


وسلمت علية ؟
لا مسلمتش ليه ليه ؟ انا زيي زيه هو طلع في الاعلان و أنا طلعت في الاعلان


وشايف نفسم أنت نجحت أكتر في الاعلان و لا بودي ؟
أنا نجحت أكتر منه 100 مرة


طيب وبتشوف الكلام اللي بيتكتب عليك؟
بشوفهم وهما حطيين الصور بتاعتي و كواليس الاعلان و اكتر كلام معلق معايا "
أوشا رئيس الجمهورية ، اوشا بن حتتنا ، أوشا بن المنطقة بتاعتنا "، لكن
معرفتش ارد علي حد لأن عددهم كبير أوي مش عارف أرد علي مين ولا مين.


ولسه بتروح النادي؟
لا خلاص مبقتش بروح النادي عشان مبقتش فاضي و كمان انا مضيت عقد مع شركة
روزناما عشان همثل في فيلمين و هعمل اعلان عشان كده مبقتش فاضي خالص و بخلص
ورق الشركة طلباه مني, ده غير اني بجهز نفسي عشان المدرسة.
طيب لما بتشوف صورك علي الانترنت و الفيس بوك بتحس بـ أيه؟
بصراحة بكون مبسوط اوي بحس اني بقيت مشهور و خلاص الناس كلها بقت تعرفني
وبفرح اوي من الكلام اللي بيتكتب عشان كله حلو مبلقيش حد بيغلط خالص.


مين اللي خلي اسمك أوشة؟
انا طول عمري معروف في المنطقة بـ"محمود" لكن سموني اوشه المخرج و المنتج في الاعلان.


بتحب مين يا محمود من المشاهير ؟
أنا بحب كريستيانو رونالدو اوي و اناحالق الحلقة بتاعته دلوقتي وكمان بحب ميسي أوي وبتعجبني حركاته.


وأيه أكتر حاجة بتحبها؟
بحب ألعب علي الـ"بلاي أستيشن أوي" .

شكرا لك اخي الحبيب
الله يعطيك العافية
جزاك الله كل خير