ابوذيات راقت لي

@@@@@@@
صرت نجار لاانجر..ولادك
ولغيرك مارجف كلبي..ولادك
تدري ليش ماارمش..ولادك
لان كلوبنه يدكن سويه
******************
وكع ميزاني من حبك..وإلك دك وكلبي المايدك لأحد..وإلك دك
جهازي اتصل من وحده..وإلك دك
لان اثنينه نحبك سويه
******************
إلك عبره بسواجي العين..منساك
بوسط كلبي وصرت للروح..منساك
إذا كلبك نساني بيوم..منساك
تضل رغم البعد غالي عليه
******************
ياما أكتبت من حبك..ملازم
وإذا عالبوسه مااريدن..ملازم
صرت جندي وعليه أنت..ملازم
وتمر من يمي وأخذلك تحيه
******************
شكثر بجفاك ون كلبي..وهم لك
وعقلي غفل فاركني..وهم لك
شتظن أنساك يالغالي..وأهملك
وأنت بدمي دم يدور بيه
******************
هاك خيوط كلبي..هاك ابرهه
واذا ماكفك بحرهه..هاك برهه
الك حسره بدليلي..هاكبرهه
تبجي المن صخر كلبه عليه
******************
اخذ بيه طبع لاذم..ولا داس
وجدمي مامشه لشينه..ولا داس
لهذه ماربح حظي..ولا داس
وصفه حته الربح خسران أليه
*******************
ألك معزوفه من تحجي..وألك حس
وألك ذوق شكثر مرهف..وألك حس
احبك والله يمعود..ولك حس
وأطش جكليت من تسأل عليه
*******************
نزل دمعي على الخدين..ينزف
وهجرك بالكلب شريان..ينزف
اشو كلمن أحبه بيوم..ينزف
ولا واحد عشكته وصار أليه
*******************
حبي فوك حبك زاد..مرتين
وابد بالدنيه محد عاش..مرتين
تدري العمر لو ينعاد..مرتين
اشيلن عمري ألك وانطي هديه
********************
أفز من يكبل وليفي..وافر بي
اشبكه ومن فرحتي اركص..وافر بي
أذا بالشته وجو بارد..وفر بي
أحس تموز حضنه يصير أليه
********************
بديت وما عرفت شلون..بدواي
عليل وحارت الخوان..بدواي
أذا أنت طبيبي تعرف..بدواي
لدوه يمي وحرم عليه
*****************
فال الخير مامره..فولي
وحبك هم ترس كلبي..فولي
وإذا ماعاجبك فشطح..فولي
بس بشرط خن نولي سويه
******************
وحك الفرض والفرض..علي دين
وصحبتك للأبد تبقى..علي دين
تره الرجلين لوعجزت..عاليدين
ازحفلك زحف وأوفي العليه
******************
طك بوري الكلب آبي..وره آبي
وكضيت العمر بس اتعب..واربي
وحق حيدر علي أمامي..وربي
أضل أهواك لأخر نفس بيه
******************
انه الشديت جرحك ليش..حليت
ومثل حلت مدارس علي..حليت
ذكرتك بامتحاني وغلط..حليت
شجاوب وأنت شاغل حته أديه
*******************
شلك بالذي ياذيك..لأذاك
اتركه وبعد لاتطري..لأذاك
أكله الدرب هذا يكول..لأذاك
لايندل ولا يستدل بيه
*******************
امش مملح غيرك..يمشي فاهي
وعجز يوصف أشفاهك..يم شفاهي
لون توصل اشفافك..يم شفاهي
الزك من تحط طلقات بيه
****************
ألك شفتين تكتك..ولي عني
وأحس بنار جنهن..ولعني
شني مسودن وأكلك..ولي عني
لوشارب نفط وجنون بيه
*****************
بعد يادهري حد سيفك..وسن بي
مادام الجفن يضحك..وسن بي
زوج عيون بي تكتل..وسن بي
أذا يضحك تروط الكاع بيه
******************
اشد حزام للصحبه..والأشكال
وحبك موشكل واحد..واله أشكال
تدرون الزعل شنهي..والأشكال
شلونك كتله كال تعيل بيه
*******************
يمر هجرك على كلبي..بألف عام
وعليه اليوم بغيابك..بألف عام
اخوي وعهد مابدلك..بألف عام
شبدلك وأنت اعز من روحي عليه
*******************
شكيت جروح كلبك..وأنت داري
وشكثر داريت كلبك..وأنت داري
تكلي ارحل لدارك..وأنت داري
وشحلات العمر لونبقه سويه
********************
كلبي شما ذكر اسمك..الم بي
صاير بي جرح يشكي..الم بي
لجل عينك أطش عمري..الم بي
واصيرلك جسر تعبر عليه
*****************
صحيح بعيد بس كلبي..شعر بيك
حزين وباقي بس يكتب..شعر بيك
عجيبه شلون ضل اسود..شعر بيك
انه بفركاك ماضل شعر بيه
******************
أقوم أجلالا لحسنك..واقف لك
وأسجل كلبي ياخلي..وقف لك
وأحطنك بي واقفلنه..وقفلك
وأطب بصدري وأقفلكم عليه
******************
الوفه مامات بعده..صاحي بينه
وكبل ماصاح بيكم..صاح بينه
شكثر بالدنيه عالم..صاحبينه
بس اعز منك ابد مامر عليه
******************
تعب حالي وتعذب..من بعدكم
وحيد ومالي صاحب..من بعدكم
انه ماحبيت عالم..من بعدكم
ومثل حبكم ابد مامر عليه
******************
شربت الجاي مر مر..بستكانه
ولا ضليت كاعد..بستكانه
سبع بوسات يسمر..بستك انه
ولا اشبع لون أوصل الميه
******************
تسودن من نظر حسنك..وهاباك
حسن يوسف جمع زوده..وها باك
جزيل الشكر هالمك..وها باك
لان ولدوك وأنت تلوك أليه
******************
حسنك لغز كلش صعب..حله
وشد كلبي وعكد وياه..حله
الكلب يم ابن بابل وأسد..حله
وبقه بس الجسم بالقادسيه
******************
جرحك مابره ولادار..حوله
بأيدي ومن بنيت الشرك..حوله
الوكت ينظر أليه بعين..حوله
سلب روحي وطلع مشتبه بيه
******************
سجاجين الدهر بحشاي..بردان
حزني وصرت بالصيف..بردان
صرت مجبور اشد أردان..بردان
ولاامد للشماته جفوف أديه
*******************
حبيبي لاتجس نبضي..شمالي
وغدت يمناي ماتوصل..شمالي
أني الجنت العذيبي..شمالي
صرت شرجي وعلى الوادم آذيه
*******************
نشدت الناس عنك وأنت..ماكو
وعليه الهم يصاحب مثله..ماكو
أريد اسع أخبارك شكو..ماكو
وانه الممنون من تسأل عليه
*******************
كتلك موشجي وكتلي..شجاني
شجنيت بعشرتك كلي..شجاني
كبل جنت أنحضن وانشم..شجاني
كنفذ والحضن حسره عليه
*****************
خشن كلبي بسب هجرك..ونعمه
ومحبتك ياترف رحمه..ونعمه
وإذا مريت من يمي..وانه أعمه
من أشم عطرك يرد البصر ليه
******************
ابد ماعندي كل غايه..من احمد
ولا عدنه طبع نمدح..منحمد
لوعنك يسألوني..من احمد
أكلهم نبض كلبي وكلشي بيه
******************
ألك حن الكلب يسمر..وألك راد
وغيرك ماهوه كلبي..وألك راد
عرب ماطيبو علتي..ولااكراد
دواي أنت الترد الروح بيه
******************
تسودن عقلي من حبك..وجن ليك
وجمع شمس وكمر ربك..وجن ليك
شفت نحلات رصدنك..واجن ليك
كل ضنهن عسل شفتك خليه
******************
أتعارك ياحلو لأجلك..واطك طك
وللحساد أذب حرمل..واطكطك
افرح من تراسلني..واطك طك
واطك أصبع لون تسأل عليه
******************
حبيبي بيا بخت وياي..شديت
وعده هجرك ألي شقدمت..شديت
بأصبعك حته تذكر خيط..شديت
انحصر دمك ولا فكرت بيه
******************
ذبل عود الكلب لأجلك..وخاوي
وابد مااحط اخو غيرك..وخاوي
الفخر مو للذي عاشر..وخاوي
الفخر للطيب ويذكر خويه
******************
عبر دمعي بغيابك..للسفينه
وابد ماراح حبك..لسه فينه
نصبته شراع كلبي..للسفينه
لان حبك بحر مجبل عليه
*****************
سفن شوكي مشت ببحور..وانهار
ونفذ حته صبرهه الروح..وانهار
احن لشوفتك كل لليل..ونهار
أشوفك وين واحجيلك البيه
*****************
حلو الطبع واصلني..وقارب
أني ماعندي أهل غيرك..وأقارب
سفينه بالبحر ردتك..وقارب
تشيل الحمل من يثكل عليه
******************
وحك من نزل الكوثر..والآيات
راحت روحي بخلافك..ولايات
فاضت دول بدموعي..ووليات
وأفيض الكون أذا ماتمر بيه
******************
يهل تنشد على حالي..تراني
بسجن يهواي من بعدك..تراني
شمس مااشوف بالدنيه..تراني
مغيمه وكل وكت تمطر عليه
*******************
حسنك صعب يالغز..ياسر
الرمش يكتل أذا ماكتل..يأسر
نخيت الكال صبرا آل..ياسر
يحفظك بجاه عمار وسميه
*******************
أنا العطشان منك..مي اتاني
ومثل صبر بغيابك..من يتاني
تكلي شلون صحتك..ميت أني
أذا بأخر نفس تلحك عليه
*******************
وكع كلبي بغرامك..ماتشيله
وجرح كلبي الجرحته..ماتشيله
أخابر وأنت تسمع..ماتشيله
أبوي احترك خايب رد عليه
*******************
ردت مره على كيفي..منك أبسل
تالي اطلعت روحي..منك أبسل
تدري شراح أسوي..من اكبسل
أدج روحي وأكلهم عال بيه
********************
كلبي مارغب غيرك..ولاحب
ولافكر يحب غيرك..ولاحب
مريض ومايريد ابره..ولاحب
بس صوتك يرد الروح بيه
*******************
ألك مني رسالة شوك..نصن
يل منك جبال الشام..نصن
موحكه دليلي انكسم..نصين
نص الكم والأخر للاذيه
****************
ماتنطق صم أتقاتل..صمت لاك
حجر سجيل بجفوفي..صمتلاك
أول يوم عيد الله..صمت لك
واجت لعنت محمد ترس بيه
*****************
فرصه انطيني وأمهلني..لعلماك
أخاف تكول ماادري..لعلمك
أني الساريه الواكف..لعلمك
من أطيح تطيح خركه اعالوطيه
*****************
حمه جسمي بغيابك..يامحامي
وكضيت العمر كله..يامحامي
بعد يلحك عليه..يامحامي
أذا روحي وعلي ترفع قضيه
******************
عليك القيت حجه..والقي يامه
ويامه براسك أحجي..وألقي يامه
تدري الحشر يمته..والقيامه
القيامه والحشر زعلك عليه