جوجل تحتفل بعيد ميلاد إسماعيل ياسين

كعادة موقع جوجل اللي بيهتم بالشخصيات المهمة في كل البلاد، النهاردة بتحتفل بعيد ميلاد فنان الكوميديا المصري " إسماعيل يس " اللي اتولد في 15-9-1912 في السويس، وبعد كده بدأ حياته الفنية في القاهرة في اول الثلاثينيات كمطرب مش كممثل، إلا إن دمه الخفيف وشكله اللي مكنش وسيم خلي المشوار ده عليه بعيد، لحد مابدأ حياته كمونولوجست في الحفلات اللي خلته يكون نجم من نجوم الاستعراض والسينما والمسرح في الوقت ده وطلع بسرعة الصاروخ ودخل قلوب الناس وفضل علي القمة وبدأ في انتاج افلام بأسمه زي اسماعيل ياسين في الجيش وإسماعيل ياسين في الطيران وإسماعيل ياسين في مستشفي المجانين وغيرهم من الافلام اللي بقت علامات في تاريخ السينما المصرية، ومونولوجاته اللي كان بيتريق فيها علي الاحوال الموجودة ساعتها.
ولكن نهاية اسماعيل ياسين مكنتش زي بدايته، حيث إن في بداية الستينات بدأ يقع من علي القمة بشدة بسبب الوجوه الجديدة اللي ظهرت علي الشاشة والنمطية في اداء الشخصيات بسبب اعتماده علي صديقه " ابو السعود الابياري " في تأليف كل اعماله وده اللي خلي الجمهور ميدخلش افلامه بسبب عدم التجديد والتكرار واللي زود الموضوع مرضه بالقلب، وبدأ نجم اسماعيل ياسين ينطفي رغم محاولاته في إنه يرجع للجمهور تاني سواء عن طريق المسرح او الاستعراضات إلا إن الجمهور كان اتغير من ناحيته، وعاش اسماعيل ياسين اخر ايام حياته في حزن واكتئاب بسبب الانهيار في حياته الشخصية وفي حياته العملية لحد ما اتوفي بسبب ازمة قلبية حادة في 24 مايو 1972 فارق الدنيا فيها.
يذكر أن الفنان " أشرف عبد الباقي " قدم في رمضان 2009 مسلسل بيعرض السيرة الذاتية لإسماعيل ياسين تحت أسم " أبو ضحكة جنان " واللي كتبه المؤلف أحمد أبو السعود الإبياري.

شكرااا للخبر
ننتظر المزيد من الاخبار تحياتي